التنمر الإلكتروني

يعني إيه؟

التنمر الإلكتروني هو التنمر باستخدام التكنولوجيا الحديثة، زي وسائل التواصل الاجتماعي وتطبيقات المحادثة ومنصات الألعاب والهواتف المحمولة، وهو سلوك متكرر هدفه تخويف أو استفزاز الشخص أو تشويه سمعته أو التحرش بيه.

من الأمثلة عليه:

• نشر الأكاذيب عن شخٍص أو نشر صور محرجة له على وسائل التواصل الاجتماعي.
• إرسال تهديدات عن طريق الرسائل.
• انتحال شخصية شخص وعمل ملف مزيف ليه.
• نشر المعلومات الشخصية لشخص زي العنوان ورقم التليفون..
• السخرية والتقليل من شخص في محادثة جماعية.
• التقاط فيديو أو صورة محرجة لشخص ومشاركتها على الانترنت بدون استئذان.

إزاي أفرق بين الهزار والتنمر؟

لو حسيت بالأذى، فده معناه إن فعلًا الهزار ده تجاوز حدوده. 

كمان لو الهزارده استمر حتى بعد ما طلبت من الشخص التوقف وعبرت إنك متضايق. 

أوقات التنمر الإلكتروني بيلفت انتباه مجموعة واسعة من الأشخاص ومنهم غرباء. لو ده حصل وإنت مش موافق فإنت مش مضطر أبدًا تتحمله. 

مهم نعرف إن لكل الناس الحق في الحصول على الاحترام سواء في الواقع أو على الانترنت. 

مهم نعرف كمان إن التنمر الإلكتروني مش نادر الحدوث بالعكس في أبحاث بتقول إن حوالي 7 من كل 10 شباب اتعرضوا للإساءة عبر الإنترنت في مرحلة ما. 

الآثار المترتبة على التنمر الإلكتروني

لما حد بيتعرض للتنمر بيحس كأنه بيتهاجم وبيتحاصر من كل ناحية, اللي بيتم نشره على الانترنت مش بيتمسح أو ينتهي بسهولة عشان كدة تأثيرات التنمر الإلكتروني ممكن تستمر لفترات طويلة واللي منها: 

• الشعور بالضيق والخجل والحزن والغضب والوحدة والرغبة في الانعزال وفقدان الاهتمام بالأنشطة اللي بتحبها.
• الشعور بالإجهاد والأرق والتعرض لمشكلات صحية زي آلام المعدة والصداع.
• التأثر الدراسي, الغياب من المدرسة أو ترك المدرسة.
• انخفاض الثقة بالنفس وتقدير الذات.
• التعرض للتنمر الإلكتروني بيخلينا عرضة لاضطرابات نفسية زي القلق والاكتئاب و إدمان المخدرات.
• التعرض للتنمر الإلكتروني ممكن يؤدي إلى التفكير في الانتحار.

إيه اللي أقدر أعمله لو تعرضت للتنمر الإلكتروني:

• إنت مش لوحدك ومش مضطر تتحمل ده.
• اثبت التنمر بإنك تحتفظ بصورة من الشاشة أو فيديو كدليل.
• في مواقع بتوفر اختيار حظر الشخص المتنمر والتبليغ عن التعرض للإساءة زي فيس بوك وانستجرام..
• الإبلاغ عن طريق مباحث الانترنت.
• في حالة الخطورة على حياتك ممكن تبلغ الشرطة.
• اتكلم مع شخص بالغ تثق فيه زي الوالدين أو مدرسك في المدرسة:

إنك تتكلم مع أهلك ممكن تكون حاجة مش سهلة، ولكن ممكن نحاول نخلي الخطوة دي أسهل شوية عن طريق 

• إنك تختار وقت مناسب يكونوا مش مشغولين فيه وفي كامل انتباههم ليك. إنك تشرح ليهم مدى خطورة المشكلة بالنسبة ليك. كمان وارد إنهم مايكونوش على معرفة بالتكنولوجيا اللي تعرفها أنت، وعشان كدة هتحتاج تساعدهم على فهم اللي حصل. ممكن مايكونش عندهم إجابات فورية لكن بالنهاية هما أهلك وعاوزين يقدموا المساعدة ولما عقلين يفكروا سوا في حلول مش زي عقل واحد بس.

أعمل إيه لو شفت صاحبي بيتعرض للتنمر الإلكتروني؟

• أهم حاجة إنك ترفض المشاركة في التنمر وده هيساعد على وقف انتشاره.
• قدم الدعم عن طريق إنك تسمعه كويس وتديله مساحة للتعبير عن مشاعره.
• إسأله أقدر أساعدك إزاي؟
• فكره بإنه ممكن يبلغ عن المحتوى وبإنه محتاج يكلم شخص بالغ موثوق فيه.

نصائح الاستخدام الآمن للانترنت

مشاركاتنا على الانترنت مش من السهل مسحها وممكن تفضل موجودة للأبد وممكن حد يستخدمها لأذيتنا فيما بعد, عشان كده بنحاول نستخدم الانترنت بأأمن صورة للحفاظ على خصوصيتنا، وتأمين بياناتنا ضد أي اختراق: 

• حدّث البرامج أول بأول لتلافي أي ثغرات أو نقاط ضعف ممكن منها يحصل اختراق.
• استخدم كلمات مرور قوية ومميزة ومش سهل التعرف عليها "بلاش استخدام تواريخ الميلاد أو أرقام التليفون لأنه من السهل تخمينها"
• استخدم خاصية التحقق الثنائي: على سبيل المثال، كلمة المرور تكون الخطوة الأولى ثم البصمة تكون الثانية، ومحدش يقدر يدخل غير باستخدام الخطوتين سوا.
• اختار من إعدادات الخصوصية على مواقع التواصل الاجتماعي إنت حابب تشارك معلوماتك الشخصية مع مين, مين ممكن يبعتلك رسائل أو يشوف الملف التعريفي بتاعك أو صورك أو يكتبلك تعليقات.
• ممكن تستخدم اختيار " إلغاء الصداقة"، أو حظر الأشخاص تمامًا لمنعهم من رؤية ملف التعريف بتاعك أو الاتصال بيك.
• اتأكد من الروابط قبل ما تدوس عليها وتفتحها, أوقات ممكن الروابط يكون شكلها آمن لكن ممكن تكون طريقة لاختراق حساباتك.
• تجاهل الرسائل المثيرة لللشك حتى لو شكلها جميل, زي إنك كسبت كذا أو لو دوست هنا هتكسب كذا أو إنشر الرسالة دي عشان تكسب.