التحدث حول الجنس

سن المراهقة هو سن في تحديات كتير. مرحلة بنكبر فيها و بنطلع من شرنقة الطفولة و بنفهم فيها نفسنا و بتتكون فيها شخصيتنا. في سن ده كمان بنوصل لمرحلة البلوغ و بيبدأ يظهر الفضول الجنسي. و دي يمكن من أصعب التحديات بالنسبة لأي مراهق في العموم و بالنسبة لنا احنا في الدول العربية بالذات.

المراهق في المرحلة دي بيتطور مش بس جسمانيا، كمان مشاعره بتطور و مهاراته الإجتماعية بتطور. و مش معنى إنه بدأ يبقا عنده فضول جنسي إنه عايز يمارس الجنس. ممكن يكون عايز يحس بمشاعر الحب و الحميمية. ممكن يكون عايز يعيش تجارب زي الكبار. و كل دي حاجات مهم يتعلم يتصرف فيها ازاي بشكل صحي و مناسب. و الأهل هما أحسن شخص يعلم أولاد التصرف السليم. 

التطور الجنسي و الفضول الجنسي بيتكون من حاجات كتير 

• نفهم أجسامنا بتشتغل ازاي.
• نقدر ناخد قرارات سليمة و فعالة تجاه جسمنا و حياتنا بشكل يتناسب مع قيمنا و أخلاقيتنا.
• نقدر نعبر عن إحساسنا و إحتياجاتنا بشكل فعال من غير ضرر لنفسنا ولا لحد.
• نكون علاقات محترمة و صحية.

بالرغم من إن المراهقين ممكن يسمعوا معلومات عن التطور الجنسي و الممارسة الجنسية من أصدقائهم أو على مواقع التواصل الإجتماعي و الإنترنت إلا إن كلام الأهل مع أولادهم في السن ده بيسمح لهم ياخدوا معلومات موثوق فيها بشكل آمن و متناسب مع القيم و الأخلاق اللي مهتمين نزرعها فيهم.

أتكلم ازاي مع أولادي عن التطور الجنسي 

الكلام مع أولادنا عن موضوع زي ده من الطبيعي جدا انه يكون مش مريح و مش سهل، لينا و ليهم هما كمان. و لكن في بعض الحاجات اللي ممكن تسهل عليك الأمور:

• إستعد كويس 

  القراءة عن مختلف النقط و إنك تتأكد من معلوماتك حاجة مهمة عشان تقدر تجاوب على إستفسارات المراهق ردود مناسبة و مقنعة. كمان مهم تعرف ايه هي الأخلاق و المبادئ المناسبة ليكم كأسرة، لأن هي دي الحاجات اللي ح تبقا حابب تاخدها في الاعتبار و أنت بتتكلم معاهم.

  بعض المواضيع المقترحة للقراءة: البلوغ، الدورة الشهرية، الاحتلام، العادة السرية، مشاهدة المواقع و الأفلام الإيباحية.

• إختيار الوقت المناسب للكلام 

  بمعنى إنك تحاول تختار وقت مايكونش ابنك/بنتم مرهق أو تعبان، مايكونش مشغول أو متشتت، ميكونش مضغوط بسبب إمتحانات مثلا. ممكن تهيأه من قبلها إنكم محتاجين تقعدوا تتكلموا عشان يكون جاهز. 

• لما تيجي تتكلم معاه... 
  • خليك واضح جدا معاه عن توقعاتك بشأن تصرفاته و إيه المرفوض و وضح له أسباب رفضك.
  • إستخدم مهارات الإستماع الجيد.
  • إسأل المراهق هو يعرف ايه الأول و من هنا أبدأ أصلح له الأخطاء و أضيف معلومات جديدة.
  • خليك صادق. لو في حاجة ماتعرفهاش، أطلب من ابنك/بنتك وقت عشان تدور على الإجابة.
  • طمن ابنك/بنتك إنك عايز تفهم وجهة نظرهم و تناقشهم فيها و إن مفيش داعي للخجل من أي أسئلة.
  • إختار ألفاظك كويس و حاول يبقا عندك خلفية عن المسميات المناسبة لسنه.
  • الكلام عن بعض المواضيع الإضافية المهمة: زي التحرش الجنسي و تطمينه إنك محتاج تعرف أي حاجة – لا قدر الله – تحصل له عشان تقدر تساعده.