الطب النفسي للأطفال والمراهقين
التواصل الجيد
من أهم الحاجات اللي بتساعد في نجاح العلاقات هو التواصل الجيد. و نص المجهود اللي أعمله عشان أتواصل مع أي حد هو إني أسمعه كويس.
إستخدام"مهارات الإنصات الفعال" بتساعدك إنك تحسن التواصل مع المحيطين بيك و بتوصل لهم رسالة إنك مهتم بكلامهم و وجهة نظرهم. من مميزات الإنصات الفعال كمان، إنه بيرفع من عليك حمل إنك لازم تحل المشاكل. أنت بتتعاون مع الطرف التاني إنكم توصلوا لحل مع بعض.
نصايح لتحسين مهارات الإنصات الفعال
- خليك "هنا و دلوقتي"
خليك مركز في اللي بيتقال دلوقتي و لاحظت إنك بدأت تسرح حاول ترجع إنتتباهك للي بيتقال.
ح يساعدك في ده إنك تسيب التليفون أو تقفل التلفزيون. لو في إيدك حاجة بتعملها و تقدر تأجلها، أجلها. إسمع الكلام اللي بيتقال و ركز فيه و إفهمه، ماتفكرش ح ترد تقول إيه بعد كده.
كل ده بيوصل رسالة للي بيتكلم إنه مهم و كلامه مهم بالنسبة لك و إنك مهتم إنك تفهم إيه وجهة نظره و هو حاسس بإيه. - حاول تفهم وجهة نظر الطرف الآخر و وصل ده
أسمع كويس اللي قدامك بيقول إيه و حاول تفهم كلامه و هو حاسس بإيه (ده مش معناه إنك لازم تتفق معاه). ممكن تعيد صياغة كلامه و تقوله له، ده بيوصل رسالة إنك سامع كويس و بيشجعه إنه يتكلم أكتر. ممكن كمان كل كام جملة تلخص كلامه و تقوله عشان يعرف إنك سامع.
حاول إنك تكون دقيق في كلامك و تختار ألفاظك بحكمة من غير إتهامات أو إفتراضات أنت مش متأكد منها.
- لغة جسمك مهمة
حاول إنك تقعد مع الطرف الآخر و تكون قريب منه. ده ح يدي إنطباع إنك فعلا مهتم تسمع و تفهم وجهة النظر اللي بيعبر عنها.
ماتربعش إيدك أو تحط رجل على رجل. حاول تكون مرتاح في قعدتك و في نفس الوقت جسمك متوجه ناحية الشخص اللي بيتكلم. ساعده إنه يعرف إنك سامعه بإنك تهز رأسك أو تعلق على كلامه بجمل قصيرة زي "فاهم قصدك" أو "واضح إن دي حاجة صعبة/سهلة"...
من الأفضل إنك تكون باصص للشخص اللي بيتكلم، ده ح يوصله إنك شايف كلامه مهم و مركز فيه.