اضطراب ثنائي القطب 
 

الاضطراب ثنائي القطب هو اضطراب ممكن يحصل فيه إن مزاجك يبقى عالي جدًا أو منخفض جدًا، في شكل نوبات تستمر لأيام أو أسابيع متتالية.

بيصيب شخصًا واحدًا من كل 100 شخص وغالبًا ممكن يبدأ يظهر في مرحلة المراهقة، وعادةً بتبدأ الأعراض بين سن 15 و 19 سنة.

من المهم إننا نعرف إنه حتى لو أصبت باضطراب ثنائي القطب, فبالعلاج المناسب، ممكن جدًا مواصلة حياتك وتحقيق أهدافك وممارسة الأنشطة اللي بتستمتع بيها بشكل عادي جدًا.

أعراض الاضطراب ثنائي القطب:

تقلبات مزاجية قوية من ضمنها نوبات الهّوس:

في نوبة الهَوس بتحس بإن مزاجك عالي جدًا، وإن عندك طاقة كبير وحماس شديد. نوبات الهوس بتختلف عن المزاج الجيد العادي، لأن المشاعر بتكون شديدة جدًا وبتستمر لفترة طويلة على الأقل أسبوع. كمان في حاجة اسمها نوبات الهَوس الصغرى ودي بتشبه نوبات الهَوس لكن بتستمر لفترة أقل ممكن 4 أيام.

  • الشعور بالسعادة "العالية" أو الشديدة.
  • زيادة الثقة بالنفس والطاقة.
  • زيادة التهيج والعدوانية.
  • إنك مش محتاج للنوم.
  • بتتشتت بسهولة.
  • الكلام الكتير وبسرعة.
  • دماغك فيها أفكار كتير وبتتداخل مع بعضها بسرعة.
  • سلوكيات عالية الخطورة: زي إنك تصرف فلوس كتير فجأة أو تبقى اجتماعي بزيادة أو أو تدخل في علاقات جنسية على غير العادي بتاعك.
  • زيادة الرغبة الجنسية.
  • ضعف الحكم على الأمور والتفكير بمنطق وحكمة.

مش أي حد يمر بشكوى أو اتنين من الأعراض دي معناها إن عنده نوبة هوس أو اضطراب ثنائي القطب لأن التشخيص بيحتاج وجود مجموعة من الأعراض لفترة زمنية وإن الأعراض دي تكون مسببة لينا عّطلة في حياتنا والطبيب النفسي هو الشخص الوحيد اللي قادر على تأكيد التشخيص.

نوبات من الاكتئاب:

ممكن تضمن أعراض اضطراب ثنائي القطب فترات أو نوبات من الاكتئاب اللي بتستمر على الأقل أسبوعين متواصل.

  • مش عندك رغبة في القيام بأنشطة كنت بتستمتع بها قبل كدة
  • النوم أكثر أو أقل من المعتاد.
  • الأكل أكثر أو أقل من المعتاد.
  • الشعور بالانزعاج أو الحزن الشديد أو التعاسة أو الوحدة.
  • أفكار سلبية عن نفسك ونقد ولوم وإحساس بالذنب.
  • الشعور باليأس.
  • أفكار في الموت أو إيذاء النفس أو الانتحار.
  • الشعور بالتعب وعدم وجود أي طاقة.
أعراض ذهانية:

ممكن أعراض اضطراب ثنائي القطب خصوصًا أثنا نوبات الهَوس تتضمن وجود أعراض ذهانية أشهرها ضلالات العظمة: زي مثلًا إني يسيطر عليا اعتقاد إني شخص عظيم أو عنده قدرات خارقة أو نَبي..

ممكن يظهر هلاوس سمعية: زي إني أسمع صوت بيكلمني ومحدش موجود معايا أو محدش تاني بيسمعه غيري.