إضطراب المسلك
إضطراب المسلك من أكتر الحاجات اللي بنشوف المراهقين في العيادات النفسية بسببها بما إنه إضطراب سلوكي، بيكون سهل على المحيطين ملاحظته - و إن كان عدم معرفتنا بوجود تشخيص زي ده ممكن يأخر لجوءنا للمختصين - و في الغالب المشاكل السلوكية دي بتكون مزعجة جدا للمحيطين بالمريض في حين إن المراهق نفسه ممكن يكون مش حاسس بحجم الانزعاج ده. كمان ممكن يحط المراهق في احتكاك مع الجهات القانونية و ده جزء أساسي من خطورته.
أكيد لما ولادنا يبان عليهم أعراض سلوكية مزعجة بنسأل نفسنا ليه؟ الحقيقة إن مفيش سبب واحد محدد بيأدي لوجود مشكلة زي دي. غالبا بيكون المراهق عنده إستعداد جيني بمعنى إن هو أصلا مخلوق ببعض الجينات اللي بتسمح بظهور أعراض زي دي، بس الاستعداد الجيني لوحده مش كفاية. تعرض المراهق لحاجات معينة في البيئة اللي حواليه زي الفقر أو الرقابة الضعيفة على السلوكيات بالإضافة للمشاكل الأسرية اللي من ضمنها الأخطاء التربوية أو عدم الاستقرار الأسري أو الإساءة الجسدية زي الضرب و الإساءة اللفظية زي الإهانة و التقليل المستمر.
زي ماهو واضح من الاسم: نمط متكرر في السلوكيات أهم ما فيه هو التعدي على حقوق الغير و تكسير للقواعد الأساسية بما يتناسب مع السن و الثقافة العامة.
بعض الأعراض
- التنمر و تهديد و تخويف الآخرين.
- إفتعال الشجارات اليدوية (خناقات تصل للضرب).
- التعامل بقسوة مع الحيوانات.
- سرقة الآخرين.
- إشعال الحرائق عن عمد.
- الكذب المستمر لتجنب العواقب أو تحقيق المكاسب.
- الهروب المتكرر من المنزل و من المدرسة.
لو بعد ما قريت شكيت إن حد من أولادك – لا قدر الله - بيعاني من مشاكل إضطراب المسلك، ممكن تتوجه لعيادات المراهقين في مستشفيات الأمانة العامة للصحة النفسية، هناك حتقابل أطباء متخصصين يقدروا يساعدوك، لان العلاج النفسي هو اهم الطرق الفعالة للتدخل بالاضافة الي بعض النصائح الخاصة بيكم كاولياء امور.