التبول اللاإرادي
 

-ابني بيتبول ع نفسه يادكتور ده مرض ولا ايه ده ! 

= التبول اللاارادي هو اضطراب بيحصل ف الاطفال فوق سن 5 سنوات 

بيكون الطفل مش قادر يتحكم في التبول أكتر من مرة في الاسبوع بالليل أو بالنهار أو الاتنين, سواء بإرادته او بدون ارادته . 

-هو ابني لوحده اللي كده يادكتور ؟ 

= لا لا ده اضطراب شائع في الاطفال نسبته تقريبا 10% في الاطفال 5 سنوات 
4% في الاطفال 8 سنوات 
كمان في الاولاد أكتر من البنات .. والتبول الليلي أكتر من النهاري 

أنواعه ايه بقى ؟

نوع أولي وده يعني الطفل معداش بفترة تحكم في التبول من اول مااتعلم (مفيش فترة كان جاف وناشف) 
نوع ثانوي وده يعني الطفل مرة بفترة تحكم في التبول بعد التعلم ولكنه انتكس 

طيب نشخصه إزاي ؟؟

• أولا لازم نستثني الأسباب العضوية اللي ممكن تسبب تبول لا إرادي وأشهرها مرض السكر والتهابات المثانه ومجرى البول والديدان الدبوسية
• - تأخر في نضج الجهاز العصبي اللي محتاجينه للتحكم في التبول 
• عوامل وراثية تقريبا نسبة 70 % وخاصة من جانب الأب
• ضغوط نفسية واضطرابات ف الأسرة ماديا واجتماعيا
• صعوبات تعلم التواليت
• الحرمان العاطفي والإهمال ونقص الأهتمام ويظهر أكتر مع ولادة طفل جديد ف الأسرة
• اضطرابات نفسية اخرى يصاحبها التبول اللاإرادي زي
  •  - اضطرابات السلوك
  • -الإكتئاب والقلق 
  • -اضطراب فرط الحركة ونقص الانتباه
  • -التوحد
  • -الإيذاء والاستغلال البدني أو العاطفي أو الجنسي للطفل

ياتري الحل ايه؟

• في أطفال كتير بتتحسن لوحدها عند سن المراهقة
• وطبعا التدخل الطبي المبكر أفضل ويحمي أطفالنا من أي مضاعفات نفسية أخرى
• أول خطوة في العلاج اننا نبقى مقتنعين ان ده اضطراب عند طفلي ومحتاج مني أدعمه وأتقبله في كل حالاته
• نتوقف تماما عن اللوم وكفاية نقد لاذع
• طبعا نتوقف عن أي اهانات وأي عقاب نفسي أو جسدي 
• نظام المكافأة الايجابية : 
  لو صحيت ناشف الاسبوع ده هيكون ليك مكافئه تختارها وطبعا في حدود امكانياتنا? ولو مانجحش عادي مفيش لوم وفي الاول نخليها مكافاة يومية بسيطة لزيادة التشجيع والتحفيز 
• نتحمل المسئولية مع ماما 
  بمعني الطفل يكون مسئول عن تغيير ملابسه وتنضيفها وتنضيف سريره ومشاركة ماما الغسيل والتنضيف 
• ناخد بالنا لو لاحظنا أي اعراض نفسية أخرى على الطفل زي ضعف الثقة بالنفس او كره المدرسة وضعف التحصيل الدراسي 

وعلى فكرة العلاج السلوكي بيجيب نتيجة ف 90% من الحالات 

ياالله نتعرف سوا على شوية من خطوات العلاج 

• نتفادى يحصلنا إمساك يعني نزود الألياف ف أكلنا والسوايل الطبيعيه والألبان
• - نوقف العادات الغلط في نظامنا الغذائي زي الوجبات السريعة - الأكل الدسم قبل النوم- المشروبات الغازية والعصاير المصنعه 
•  هندخل الحمام قبل النوم مرة 
• ونظبط منبه لماما وللطفل خلال فترات النوم مرة اواتنين او اكتر ع حسب عادات الطفل ومرات التبول في اليوم
• هنعمل جدول جميل ومسلي للطفل وهيراقب بيه نجاحه وتطوره بنفسه واللي كمان هيتكافيء على اساسه
• الطفل بيسجل تحكمه ف التبول برمز الشمس الضاحكه و عدم تحكمه برمز السحابة الممطرة