الاكتئاب عند الأطفال
 

هل ممكن الطفل يجيله اكتئاب ؟ 
اه بيجيلوه بس بيكون شكله مختلف شويه عن اللي بيجي للكبار 
يمكن ده اللي بيخلي الاهل مياخدوش بالهم ان الطفل مكتئب 

طيب يعني ايه طفل مكتئب ؟
بيبدا يكون حزين ، زعلان دايما يعني بقاله فتره مش قادر و مش عايز يعمل اي حاجة حتي الحاجات اللي كان بيحبها

الاعراض

علي الاقل يكون بقالها اسبوعين كاملين او اكتر

• دايما زعلان و حزين
• مبقاش في حاجة عايزها او مهتم بيها 
• مبقاش بيتبسط بالحاجات القديمه اللي كانت بتبسطه 
• ممكن كمان يبان في الدراسه : مستوي بيقل فجاه و مش عايز يروح المدرسه 
• مبيكونش مهتم بهدومه او العابه زي الاول 
• ممكن يكون عنده مشكله في النوم ينام كتيرعن المعتاد او مبيعرفش ينام بسهوله 
• يبطل ياكل خالص او ياكل كتير جدا و ده بيبان في وزنه بيزيد او يقل 
• بيشتكي من وجع دايما في جسمه ممكن صداع او وجع في بطنه بشكل متكرر 
• التركيز بتاعه بيقل و صعب انه يفكر و يجاوب في ساعتها 
• الطفل بيعيط كتير ، بيتعصب كتير و علطول غضبان و ممكن يبدا يتخانق و يضرب اي حد 
• يبدا يتكلم عن نفسه كلام سلبي زي :انا مليش لازمه ، انا غبي ، انا فاشل ، انا وحش او انا السبب في الحاجات اللي بتحصل " و ده اسمه شعور بالذنب "
• يبدا يفكر في الموت او حد مات و عايز يروح معه و بعض الاطفال ممكن يفكروا في الانتحار

الاسباب : 

مفيش سبب واضح و صريح للاكتئاب بس في شويه عوامل ممكن توصل لده 

العوامل البيولوجيه  

و ده يعني في حد في العائله الاب او الام عندهم اكتئاب ، لخبطه في كمياء المخ 
مزاج الطفل : في اطفال مزاجهم دايما مش كويس او بيتعصب و يضايق بسرعه ده بيكون سهل ان يجيله اكتئاب 

العوامل بيئيه و الاسريه 

• البيت نفسه في دايما مشاكل و عنف و غير مستقر

العوامل المعرفيه 

• الطبيعي ان الطفل يتربي انه يعبر عن نفسه و مشاعر في بيئه مستقره و ازاي يتعامل مع اي مشكله تواجه في حياته و انها متكونش موجوده بصوره صحيه ده يعرض الطفل للاكتئاب 
• الاحداث الضاغطه او الشديده 
  زي ان حد قريب اوي للطفل يتوفي او يتعب 
  انه يتعرض للتنمر أو التحرش أو الاعتداء الجسدي او الجنسي

التشخيص 

عشان نقدر نقول ان الطفل مصاب بالاكتئاب محتاج يتعرض علي طبيب مختص و ياخد المعلومات الكافيه من الاهل و بعد كده يقعد مع الطفل و يقيمه 

بتم عمل تحاليل و فحوصات عشان نتاكد ان الاكتئاب مش ورا مرض عضوي زي مشاكل في الغده الدرقيه او نتيجه لتعاطي المخدرات 

العلاج 

• العلاج النفسي 

  بيكون عباره عن جلسات نفسيه هدفها تنميه مهارات الطفل و ازاي يقدر يعبر عن نفسه و يتعامل مع اعراض الاكتئاب زي العلاج المعرفي السلوكي او العلاج باللعب مع اخصائي نفسي ندرب علي طريقه العلاج 

• العلاج الدوائي 

  في بعض الحالات الطفل بيكون محتاج دواء عشان يساعده يتحسن 
  زي الادويه مضاده للاكتئاب متوافقه عليها من اداره الاغذيه و العقاقير الطبيه 
  و بيتم التعرف علي اهميتها و الاعراض الجانبيه عن طريق الطبيب و كيفيه استعمالها