القلق في الاطفال
القلق اضطراب شائع في الاطفال خاصة من 6-7سنوات وفي البنات تقريبا ضعف الاولاد
طيب ايه هو القلق
هو احساس بالتوتر وعدم الارتياح والعصبية بسبب الخوف من الي جاي أو توقع اللي ممكن يحصل وده بيصاحبه أعراض وتغيرات جسدية
طيب ليه الطفل ممكن يقلق
أكيد مخاوفهم ممكن تختلف عن الكبار بس ده ما يقللش أبدا من احساسهم بيها
زي ايه المخاوف دي ؟؟
- الضلمة
- الانفصال عن الأهل
- التنمر
- التعرض للإيذاء الجسدي او النفسي او الجنسي
- الحيوانات أو الحشرات
- الخوف الاجتماعي
- الخوف من الناس او الاغراب
- الموت (خاصة بعد فقد حد قريب من الطفل )
الاطفال بقى بتعبر ازاي ؟؟
- قلق الطفل بيتترجم ف تصرفاته .. والي دايما بتكون ف صورة ابتعاد .. هروب .. خوف .. خجل شديد
- زي انه مثلا يرفض يروح المدرسة
- ميرضاش يقابل الضيوف
- نوبات غضب وعصبية تتكرر ف موقف معين
- يخاف يجرب اي شيء جديد
طيب ايه الاعراض الي ممكن نشوفها ع الطفل ؟؟
زي الصداع ، الام البطن ، الميل للقيء والقيء، الاسهال ، زيادة ف التعرق خاصة اليدين والقدمين ، برودة الاطراف
زياده ضربات القلب ، ضيق التنفس ، الكوابيس
طيب ليه الطفل ممكن يصاب بالقلق
- أول حاجه العامل الوراثي والي مش بيقل عن 50% تقريبا
- اهمال الاهل ... مفيش رعاية كافية للطفل
- المشاكل الاسرية والاجتماعية
- التعرض للفقد (وفاة او سفر حد عزيز )
- التعرض للتنمر والنقد اللاذع
- التعرض للايذاء الجسدي او النفسي او الجنسي
- العنف .. والتعرض ليه او مشاهدته ف الاخبار او التلفزيون او الانترنت
- زيادة الاهتمام من الاهل
طبعا القلق مش اضطراب سهل ... وممكن يصاحبه اضطرابات تانيه زي
نوبات الهلع
اضطرابات النوم
الاكتئاب
ضعف الثقه بالنفس
طيب هو القلق ده ليه علاج
أول حاجه توعية الأسرة بالاضطراب برامج للأبوين مع الطبيب والاخصائي النفسي بكيفية التعامل مع الطفل
العلاج المعرفي السلوكي
الطفل ده عنده مشكله فى افكاره ومعتقداته وتوقعاته عشان كده بنشتغل ع افكار وسلوكياته
تدريب الطفل على تمارين التنفس وتمارين الاسترخاء وايضا برامج لتعليم الطفل المهارات الاجتماعية وتحسين الثقه بالنفس
العلاج الدوائي حسب راي الطبيب النفسي المختص يوجد انواع مختلفة من العلاج المناسب حسب السن .